ក្រគរ ខេត្តពោធិ៍សាត់៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានអំពាវនាវឱ្យម្ចាស់រោងចក្រ ឬសហគ្រាសទាំងអស់ទទួលយកកម្មករ និងកម្មការិនីរោងចក្រដែលមានពិការភាពឱ្យចូលបម្រើការងារ។
ថ្លែងនៅក្នុងពិធីសំណេះសំណាលជាមួយកម្មករ កម្មការិនីសរុបប្រមាណ ៦ ៨៦៨នាក់ មកពីរោងចក្រ សហគ្រាស ចំនួន១០ ក្នុងខេត្តពោធិ៍សាត់ នាព្រឹកថ្ងៃទី៣០ ខែមិថុនា ឆ្នាំ២០២៣ សម្តេចតេជោ បានអំពាវនាវដូច្នេះថា៖ «រោងចក្រខ្លះបានទទួលយកកម្មករកម្មការិនីរោងចក្រជាពិការ ប៉ុន្តែរោងចក្រខ្លះមិនទាន់យកដែរ សូមជួយយកជនពិការ»។
នាយករដ្ឋមន្ត្រីរំភើបដែលបានឃើញវីដេអូបទសម្ភាសជាមួយកម្មករ កម្មការិនីរោងចក្រជនមានពិការភាព ដែលពួកគេមានក្តីរីករាយដែលបានចេញមុនម៉ោង ១៥នាទីក្រោយពីរាជរដ្ឋាភិបាលបានអនុញ្ញាតឱ្យកម្មករកម្មការិនីរោងចក្រជនមានពិការភាព ឬស្ត្រីមានផ្ទៃពោះបានចេញមុនម៉ោង៕
